தமிழக அரசியல் வட்டாரத்தை உலுக்கியுள்ள ‘குதிரை பேரம்’ மற்றும் எம்எல்ஏ-க்களை விலை பேசும் சர்ச்சையில் தற்போது மிக முக்கியமான அதிரடி திருப்பம் ஏற்பட்டுள்ளது. தமிழக வெற்றிக் கழகத்தின் (தவெக) சட்டமன்ற உறுப்பினரை விலைக்கு வாங்க முயன்றதாக எழுந்த புகாரில், திமுகவின் முக்கிய நிர்வாகியும், கோவை தெற்கு தொகுதி எம்எல்ஏ-வுமான வி. செந்தில் பாலாஜி மற்றும் அவரது சகோதரர் வி. அசோக்குமார் ஆகிய இருவருக்கும் சென்னை மத்திய குற்றப்பிரிவு போலீஸார் முறைப்படி சம்மன் அனுப்பியுள்ளனர். இந்த வழக்கில் இன்று அவர்கள் இருவரும் நேரில் ஆஜராகி விளக்கம் அளிக்க வேண்டும் என அந்த சம்மனில் உத்தரவிடப்பட்டுள்ளது. இன்று ஆஜராவாரா செந்தில் பாலாஜி? என்ற பலத்த கேள்வி தற்போது அரசியல் வட்டாரங்களில் மிகத் தீவிரமாக எழுப்பப்பட்டு வருகிறது.
இந்த வழக்கினை விசாரித்து வரும் சென்னை திருவல்லிக்கேணி தனிப்படை போலீஸார், கடந்த சனிக்கிழமையன்று கரூர் மாவட்டம் ராமேஸ்வரப்பட்டியில் உள்ள செந்தில் பாலாஜியின் பூர்வீக வீட்டிற்கு நேரில் சென்றனர். அங்கு செந்தில் பாலாஜி மற்றும் அசோக்குமார் இருவருமே இல்லாததால், அவர்களது தந்தையிடம் போலீஸார் இந்தச் சம்மனை நேரில் வழங்கி, அதன் விவரங்களை விளக்கி ஒப்புதல் கையெழுத்து பெற்றுள்ளனர். மேலும், இருவரும் வெளிநாடுகளுக்குத் தப்பிச் செல்வதைத் தடுக்கும் பொருட்டு, அனைத்து விமான நிலையங்களுக்கும் லுக் அவுட் (Look Out Circular) நோட்டீஸும் அனுப்பப்பட்டு போலீஸார் தீவிரக் கண்காணிப்பில் ஈடுபட்டுள்ளனர்.
கிருஷ்ணகிரி மாவட்டம் ஊத்தங்கரை தொகுதி தவெக எம்எல்ஏ டாக்டர் என். இளையராஜா சென்னை போலீஸ் கமிஷனரிடம் அளித்த அதிரடி புகாரின் அடிப்படையிலேயே இந்த வழக்கு பதிவு செய்யப்பட்டுள்ளது. சட்டமன்றத்தில் சபாநாயகருக்கு எதிராகக் கொண்டு வரப்படவுள்ள நம்பிக்கை இல்லா தீர்மானத்தின் போது, கட்சி மாறி வாக்களிப்பதற்காகத் திருநாவுக்கரசு என்ற நபர் தனக்கு ₹35 கோடி பணம் தருவதாகப் பேரம் பேசினார் என்று இளையராஜா தனது புகாரில் குறிப்பிட்டிருந்தார். இந்த பேரத்திற்குத் தான் உடன்பட மறுத்ததால், தனக்கும் தனது குடும்பத்தினருக்கும் கொலை மிரட்டல் விடுக்கப்பட்டதாகவும் அவர் தெரிவித்திருந்தார்.
இந்த அதிரடி புகாரின் பேரில் வழக்குப் பதிவு செய்த போலீஸார், கருத்துக்கணிப்பு நிறுவனம் நடத்தி வரும் திருநாவுக்கரசு, நரேஷ் உட்பட 9 பேரைக் கைது செய்து சிறையில் அடைத்தனர். இந்தச் சூழலில், கைதான நபர்களிடம் போலீஸார் நடத்திய தீவிர ரகசிய விசாரணையில், செந்தில் பாலாஜியின் சகோதரர் அசோக்குமார் தங்களைச் சென்னையில் நேரில் சந்தித்துப் பேசினார் என்றும், செந்தில் பாலாஜி மற்றும் அசோக்குமாரின் முழு வழிகாட்டுதலின்படிதான் இந்த ₹35 கோடி பேரம் நடத்தப்பட்டது என்றும் வாக்குமூலம் அளித்துள்ளனர். கைதானவர்களின் இந்த அதிரடி வாக்குமூலத்தின் அடிப்படையில் அசோக்குமார் மீது வழக்குப்பதிவு செய்யப்பட்டுள்ள நிலையில், கைது நடவடிக்கைக்குப் பயந்து அவர் சென்னை உயர் நீதிமன்றத்தில் முன்ஜாமீன் கோரி மனுத்தாக்கல் செய்துள்ளார்.
