தமிழ்நாட்டில் ஆட்சி மாற்றம் நிகழும் போதெல்லாம் முந்தைய அரசுகளின் நலத்திட்டங்கள், அரசு அலுவலகங்கள் மற்றும் சாலைகளின் பெயர்களை மாற்றுவது என்பதும், அதற்குப் புதிய அரசியல் வண்ணம் பூசுவது என்பதும் நீண்டகாலமாகத் தொடரும் ஒரு நிர்வாக வழக்கமாகும். அந்தப் பழமையான அரசியல் பாதையையே தற்போதைய முதலமைச்சர் சி. ஜோசப் விஜய் தலைமையிலான தமிழக வெற்றிக் கழக (தவேக) அரசும் கையில் எடுத்துள்ளது.
கடந்த 2011-ஆம் ஆண்டு அதிமுக ஆட்சியில் கிராமப்புறப் பெண்களின் நிதி ஆதாரத்தை உயர்த்த கொண்டுவரப்பட்ட “இலவச ஆடு வழங்கும் திட்டம்” தவேக ஆட்சியில் “வெற்றி மகளிர் ஆடு வளர்ப்புத் திட்டம்” என பெயர் மாற்றப்பட்டுள்ளது. மாணவர்களுக்காக அதிமுக கொண்டுவந்த “இலவச மடிக்கணினி திட்டம்” தற்போது “வெற்றி லேப்டாப் திட்டம்” என மாறியுள்ளது. அதேபோல, 2006-11 திமுக ஆட்சிக் காலத்தில் “கலைஞர் வீடு வழங்கும் திட்டம்” எனக் கொண்டுவரப்பட்டு, 2011-இல் அதிமுக ஆட்சியில் “முதலமைச்சரின் சூரியசக்தியுடன் கூடிய பசுமை வீடுகள் திட்டம்” என மாற்றப்பட்டு, பின்னர் 2021-இல் மீண்டும் திமுக ஆட்சியில் “கலைஞர் கனவு இல்லம்” என உருமாறிய திட்டம், இப்போது தவேக ஆட்சியில் “வெற்றி வீடு திட்டம்” என்ற பெயரில் ரீ-பிராண்ட் செய்யப்பட்டுள்ளது. முந்தைய திமுக அரசின் முதன்மைத் திட்டமான “கலைஞர் மகளிர் உரிமைத் தொகை” (KMUT) திட்டத்திலும் “கலைஞர்” என்ற பெயர் நீக்கப்பட்டு “மதிப்புமிகு மகளிர் திட்டம்” என அரசாணைகளில் மாற்றம் பெறத் தொடங்கியுள்ளது.
ஆனால், இத்தகைய பெயர் மாற்றங்கள் மட்டுமே மாநிலத்திற்கும் ஏழை எளிய மக்களுக்கும் உண்மையான சமூக நலனையோ அல்லது பொருளாதார வளர்ச்சியையோ வழங்கிவிடாது என்பதே நடுநிலையாளர்களின் முதன்மையான கருத்தாக உள்ளது. முந்தைய அரசுகள் செயல்படுத்திய திட்டங்களில் வெறும் ஸ்டிக்கர் ஒட்டுவதையோ அல்லது “வெற்றி” என்ற சொந்தக் கட்சி வார்த்தையைச் சேர்ப்பதையோ விடுத்து, மக்களுக்குச் சேவை செய்யக்கூடிய முற்றிலும் புதிய, தொலைநோக்குப் பார்வை கொண்ட விசித்திரமான மற்றும் புதுமையான திட்டங்களைக் கண்டறிந்து செயல்படுத்துவதே ஒரு புதிய அரசின் உண்மையான சாதனையாக இருக்க முடியும்.
அவ்வாறு நிர்வாக ரீதியாகவும் கொள்கை ரீதியாகவும் புதிய பாதையை அமைக்கத் தவறினால், கட்சியின் பெயரில் “திராவிடம்” என்ற சொல் இல்லாவிட்டாலும், தவேக அரசும் தமிழகத்தில் உள்ள வழக்கமான மற்றொரு திராவிடக் கட்சியாகவே மக்களால் பார்க்கப்படும் அபாயம் உள்ளது. வெறும் தனிநபர் செல்வாக்கையும் பெயர் மாற்றங்களையும் மட்டுமே நம்பி அரசியல் பயணம் செய்வது நீண்டகாலத்திற்குப் பலன் தராது.
ஏனெனில், தமிழ்நாட்டின் அரசியல் களம் மிகவும் தீவிரமான போட்டிகளையும் மாற்றங்களையும் சந்தித்து வருகிறது. திரையுலகில் இருந்து அரசியலுக்கு வர விரும்பும் தனுஷ், விஷால் போன்ற பிற முன்னணிப் பிரபலங்களும் தங்களது அரசியல் நகர்வுகளையும் முதற்கட்டப் பணிகளையும் அமைதியாகத் தொடங்கிவிட்டனர். வரவிருக்கும் சட்டமன்றத் தேர்தல்களில் இவர்கள் தவேகவிற்கும் விஜய்ற்கும் கடுமையான போட்டியாகவும், நேரடி அச்சுறுத்தலாகவும் உருவெடுப்பது உறுதி.
எனவே, வளர்ந்து வரும் இத்தகைய கடுமையான அரசியல் போட்டிகளை எதிர்கொள்ளவும், மக்கள் மத்தியில் தங்களின் தனித்துவத்தை நிரூபிக்கவும் தவேக வெறும் பெயர் மாற்ற அரசியல் செய்வதை நிறுத்த வேண்டும். முந்தைய ஆட்சிகளை விடச் சிறந்த முறையில் சேவையாற்றும் நிர்வாக உத்திகளையும், தொலைநோக்குத் திட்டங்களையும் செயல்படுத்தினால் மட்டுமே தவேகவினால் இந்த அரசியல் சவால்களைக் கடந்து நிலையான இடத்தைப் பிடிக்க முடியும்.
