தமிழக சட்டமன்றத் தேர்தல் முடிவுகள் வெளியாகிப் பல நாட்கள் கடந்தும் ஆட்சி அமைப்பதில் நீடித்து வந்த இழுபறி, இன்று ஒரு முடிவுக்கு வரும் என எதிர்பார்க்கப்படுகிறது. தமிழக வெற்றி கழகத்தின் (தவெக) தலைவர் விஜய், இன்று மாலை 4.30 மணிக்கு ஆளுநர் ஆர்.வி. அர்லேகரைச் சந்திக்க ராஜ்பவன் செல்ல உள்ளார்.
மூன்றாவது முறையாகச் சந்திப்பு:
தேர்தல் முடிவுகள் அறிவிக்கப்பட்ட பிறகு, விஜய் ஆளுநரைச் சந்திப்பது இது மூன்றாவது முறையாகும். முதல் இரண்டு சந்திப்புகளில் ஆட்சி அமைக்கத் தேவையான ஆதரவு கடிதங்களைச் சமர்ப்பிக்குமாறு ஆளுநர் தரப்பில் கோரப்பட்டதாகக் கூறப்பட்டது. தற்போது இடதுசாரி கட்சிகளான சிபிஐ (CPI), சிபிஎம் (CPM) மற்றும் விடுதலைச் சிறுத்தைகள் கட்சி (VCK) ஆகியவை தவெக-வுக்கு ஆதரவளிக்கத் தீர்மானித்துள்ளதாக தகவல்கள் வெளியான நிலையில், இந்தச் சந்திப்பு மிகுந்த முக்கியத்துவம் பெற்றுள்ளது.
மேஜிக் நம்பர் 118 தயார்?
தவெக-விடம் தற்போது 107 எம்.எல்.ஏ-க்கள் (விஜய் ஒரு இடத்தை ராஜினாமா செய்த பின்) உள்ளனர். இவர்களுடன்:
-
காங்கிரஸ்: 5
-
சிபிஐ & சிபிஎம்: 4
-
விசிக: 2 ஆகிய கட்சிகளின் ஆதரவு கடிதங்களை விஜய் இன்று ஆளுநரிடம் சமர்ப்பிக்க வாய்ப்புள்ளதாக அறிவாலய வட்டாரங்கள் தெரிவிக்கின்றன. இந்த எண்ணிக்கை சரியாக 118-ஐத் தொடுவதால், தமிழகத்தில் ஆட்சி அமைக்கத் தேவையான எளிய பெரும்பான்மை தவெக-வுக்குக் கிடைத்துவிடும்.
ஆளுநரின் அடுத்த கட்ட நகர்வு என்ன?
“மெஜாரிட்டியைச் சட்டமன்றத்தில்தான் நிரூபிக்க வேண்டும்” என இடதுசாரி தலைவர்கள் ஏற்கனவே ஆளுநருக்கு அறிவுறுத்தியுள்ள நிலையில், விஜய் ஆதரவு கடிதங்களைச் சமர்ப்பித்தால் அவரை ஆட்சி அமைக்க ஆளுநர் அழைக்க வேண்டிய கட்டாயம் ஏற்படும். அப்படி அழைப்பு விடுக்கப்பட்டால், வரும் திங்கட்கிழமை விஜய் தமிழகத்தின் புதிய முதலமைச்சராகப் பதவியேற்க வாய்ப்புள்ளது.
தமிழகத்தின் 50 ஆண்டுகாலத் திராவிடக் கட்சி அரசியலில், ஒரு புதிய மாற்றத்தைக் கொண்டுவரத் துடிக்கும் விஜய்யின் இந்த ராஜ்பவன் பயணம், மாநில வரலாற்றில் ஒரு மைல்கல்லாக அமையப் போகிறதா என்பதை அடுத்த சில மணிநேரங்களில் நாம் அறிந்து கொள்ளலாம்.
