தமிழக அரசியல் களம் முன்னெப்போதும் இல்லாத வகையில் ஒரு புதிய திருப்பத்தை நோக்கி நகர்ந்து கொண்டிருக்கிறது. சென்னையில் உள்ள மார்க்சிஸ்ட் கம்யூனிஸ்ட் கட்சியின் (CPM) தலைமை அலுவலகத்தில் சுமார் 4 மணி நேரமாக நடைபெற்ற மாநிலச் செயற்குழு கூட்டம் தற்போது நிறைவடைந்துள்ளது. இந்தக் கூட்டத்திற்குப் பிறகு செய்தியாளர்களிடம் பேசிய சிபிஎம் தேசிய பொதுச்செயலாளர் எம்.ஏ. பேபி (M.A. Baby), ஆளுநரின் செயல்பாடுகளைக் கடுமையாகச் சாடியதுடன் தவெக-வுக்குத் தனது ஆதரவைச் சூசகமாகத் தெரிவித்துள்ளார்.
ஆளுநரின் பணி இதுவல்ல!
கூட்டத்திற்குப் பின் பேசிய எம்.ஏ. பேபி, “ஒரு ஜனநாயக நாட்டில் மக்கள் அளித்துள்ள தீர்ப்பிற்கு மதிப்பளிக்கப்பட வேண்டும். தமிழகத்தில் தனிப்பெரும் கட்சியாக உருவெடுத்துள்ள தவெக-வை ஆட்சி அமைக்க அழைக்க வேண்டியது ஆளுநரின் கடமை. அதை விடுத்து, முன்னரே பெரும்பான்மைக்கான எண்ணிக்கையைக் கோருவது ஆளுநரின் பணியல்ல. இது அரசியல் சாசனத்திற்கு முரணானது” என்று தெரிவித்தார்.
மெஜாரிட்டியை நிரூபிக்கத் தயார்:
“தவெக-வினால் மட்டுமே சட்டமன்றத்தில் மெஜாரிட்டியை நிரூபிக்க முடியும். பெரும்பான்மையை நிரூபிப்பதற்கான இடம் சட்டமன்றமே தவிர, ஆளுநர் மாளிகை அல்ல. முன்னாள் பிரதமர் வாஜ்பாய் அவர்களுக்கு வழங்கப்பட்ட வாய்ப்பைப் போல, தனிப்பெரும் கட்சியின் தலைவரான விஜய்க்கு ஆளுநர் வாய்ப்பளிக்க வேண்டும்” என அவர் வலியுறுத்தினார். இதன் மூலம் தவெக ஆட்சி அமைக்கத் தேவையான 118 இடங்களை எட்ட சிபிஎம் உறுதுணையாக இருக்கும் என்பது உறுதியாகியுள்ளது.
மூன்று கட்சிகளின் தனித்தனி ஆலோசனை:
சிபிஎம் மட்டுமின்றி, சிபிஐ (CPI) மற்றும் விடுதலைச் சிறுத்தைகள் கட்சி (VCK) ஆகிய மூன்று கட்சிகளும் தத்தமது கட்சி அமைப்புகளுடன் தனித்தனியாக ஆலோசனைகளை நடத்தி வருகின்றன. இந்த மூன்று கட்சிகளின் ஆதரவு கடிதமும் ஆளுநரிடம் சமர்ப்பிக்கப்படும் பட்சத்தில், தவெக-காங்கிரஸ் கூட்டணி பலம் சரியாக 118-ஐ எட்டும். இந்த முடிவை அறிவிக்க மாலை 4.30 மணிக்கு ஒரு முக்கியமான செய்தியாளர் சந்திப்பு நடைபெறவுள்ளது.
தமிழகத்தில் திராவிடக் கட்சிகளின் ஆதிக்கத்தை முறியடித்து, ஒரு புதிய கூட்டணி ஆட்சியை நோக்கித் தவெக நகர்வதற்கு இடதுசாரி கட்சிகளின் இந்த முடிவு ஒரு மிகப்பெரிய மைல்கல்லாகப் பார்க்கப்படுகிறது.
