தமிழக அரசியல் களத்தில் மிகப்பெரிய திருப்புமுனையாக, சென்னை அடுத்த கோவலத்தில் உள்ள தனியார் நட்சத்திர விடுதியில் தமிழக வெற்றிக் கழகத்தின் தோழமை கட்சிகளுக்கான உயர்மட்ட ஆலோசனைக் கூட்டம் முதலமைச்சர் விஜய் தலைமையில் தற்பொழுது தொடங்கியுள்ளது. நடந்து முடிந்த 2026 சட்டமன்றத் தேர்தலில் 108 இடங்களில் தனிப் பெரும் கட்சியாக வெற்றி பெற்று, கடந்த மே 10-ஆம் தேதி தமிழகத்தின் புதிய முதலமைச்சராக விஜய் பொறுப்பேற்றார். இந்த நிலையில், தவெக ஆட்சி அமைக்க ஆதரவளித்த தோழமை கட்சிகளுக்கு நன்றி தெரிவிக்கவும், அடுத்தகட்ட அரசியல் நகர்வுகளைத் திட்டமிடவும் இந்த அவசரக் கூட்டம் கூட்டப்பட்டுள்ளது.
இக்கூட்டத்தில் பங்கேற்க தவெகவின் முக்கியத் தோழமை கட்சிகளான காங்கிரஸ் மாநிலத் தலைவர் மாணிக்கம் தாகூர், விடுதலைச் சிறுத்தைகள் கட்சித் தலைவர் தொல். திருமாவளவன், இந்தியன் யூனியன் முஸ்லிம் லீக் தேசியத் தலைவர் காதர் மொயதீன் மற்றும் திமுக கூட்டணியில் இருந்து அதிகாரப்பூர்வமாக விலகி தவெகவிற்கு ஆதரவளித்த மதிமுக பொதுச்செயலாளர் வைகோ உள்ளிட்ட தலைவர்கள் கோவலம் விடுதிக்கு வருகை தந்து ஆலோசனையில் இணைந்துள்ளனர். வரவிருக்கும் தமிழகத்தின் 7 சட்டமன்றத் தொகுதிகளுக்கான இடைத்தேர்தலை தவெக தலைமையில் ஒரு புதிய மெகா கூட்டணியாக எதிர்கொள்வது குறித்தும், அந்தப் புதிய கூட்டணிக்கான அதிகாரப்பூர்வ பெயர் குறித்தும் இக்கூட்டத்தில் இறுதி வடிவம் கொடுக்கப்பட உள்ளதாகத் தகவல் வெளியாகியுள்ளது.
அதே நேரத்தில், தவெக ஆட்சிக்கு வெளியில் இருந்து ஆதரவளிப்பதாக அறிவித்திருந்த இடதுசாரி கட்சிகளான சிபிஐ மற்றும் சிபிஎம் ஆகியவை இந்த ஆலோசனைக் கூட்டத்தைப் புறக்கணித்துள்ளன. தங்களது வெளியிலிருந்து ஆதரவு என்ற அரசியல் நிலைப்பாட்டில் எந்த மாற்றமும் இல்லை என்றும், தவெக ஆட்சியைத் தொடர ஆதரவு தருவோம், ஆனால் தற்போதைக்குக் கூட்டணியிலோ அல்லது ஆட்சியிலோ தங்களுக்குப் பங்கில்லை என்பதால் இந்த ஆலோசனைக் கூட்டத்தில் பங்கேற்கவில்லை என்றும் மார்க்சிஸ்ட் கம்யூனிஸ்ட் மற்றும் இந்திய கம்யூனிஸ்ட் கட்சிகளின் மாநிலச் செயலாளர்கள் தெளிவுபடுத்தியுள்ளனர். இடதுசாரிகள் வராத நிலையிலும், மற்ற முக்கியத் தோழமை கட்சிகளை ஒருங்கிணைத்து திமுகவின் முந்தைய கூட்டணியை உடைக்கும் நோக்கில் முதலமைச்சர் விஜய் நடத்தியுள்ள இந்த முதல் அதிகாரப்பூர்வக் கூட்டணி கூட்டம் தமிழக அரசியலில் பெரும் பரபரப்பை ஏற்படுத்தியுள்ளது.
