தமிழக சட்டமன்றத் தேர்தல் முடிவுகளுக்குப் பிறகு எந்தக் கட்சிக்கும் தனிப் பெரும்பான்மை கிடைக்காத நிலையில், ஆட்சி அமைப்பதில் பெரும் இழுபறி நீடித்து வருகிறது. இந்தச் சூழலில், தமிழக வெற்றி கழகத்தின் (தவெக) தலைவர் விஜய் ஆளுநரைச் சந்தித்து ஆட்சி அமைக்க உரிமை கோரிய விதம் குறித்து, திமுக செய்தி தொடர்பாளர் டி.கே.எஸ்.இளங்கோவன் கடுமையான விமர்சனங்களை முன்வைத்துள்ளார்.
தனிப்பெரும் கட்சி அந்தஸ்தை பயன்படுத்தத் தவறிய விஜய்?
செய்தியாளர்களிடம் பேசிய டி.கே.எஸ்.இளங்கோவன், ஜனநாயக ரீதியாக ஒரு கட்சி ஆட்சி அமைக்க உரிமை கோரும்போது பின்பற்ற வேண்டிய நுணுக்கங்களைத் தவெக தவறவிட்டுள்ளதாகக் குறிப்பிட்டார். “தமிழகத்தில் தவெக தனிப்பெரும் கட்சியாக (Single Largest Party) உருவெடுத்துள்ளது. அந்த ஒரு தகுதியை மட்டுமே முன்னிறுத்தி விஜய் ஆளுநரைச் சந்தித்திருக்க வேண்டும். ‘நாங்கள் தான் அதிக இடங்களைப் பிடித்த கட்சி, எங்களுக்கு ஆட்சி அமைக்க வாய்ப்பு தாங்கள்’ என்று கோரியிருந்தால், ஆளுநர் அவரைத் தவிர்க்க முடியாது” என்று அவர் விளக்கினார்.
112 என்ற எண் கொடுத்த நெருக்கடி
தவெக செய்த மிகப்பெரிய வியூகத் தவறு, தங்களுக்கு 112 எம்.எல்.ஏ-க்களின் ஆதரவு இருப்பதாக ஆளுநரிடம் எண்ணிக்கையைக் குறிப்பிட்டதுதான் என்று இளங்கோவன் சுட்டிக்காட்டினார். “தமிழகத்தில் ஆட்சி அமைக்க 118 இடங்கள் தேவை. ஆனால், தவெக தரப்பில் 112 என்ற எண்ணிக்கையைக் குறிப்பிட்டதால், மெஜாரிட்டி இல்லை என்று சொல்ல ஆளுநருக்கு ஒரு சட்டப்பூர்வமான வாய்ப்பு கிடைத்துவிட்டது. ஒருவேளை அந்த நம்பரைச் சொல்லாமல் இருந்திருந்தால், ஆளுநர் தவெக-வை ஆட்சி அமைக்க அழைத்து, பின்னர் சட்டப்பேரவையில் பெரும்பான்மையை நிரூபிக்க உத்தரவிட்டிருப்பார்” என்று அவர் கூறினார்.
நீடிக்கும் அரசியல் குழப்பம்
தற்போது தவெக தரப்பில் எண்ணிக்கையைக் குறிப்பிட்டதால், அந்த மேஜிக் நம்பரான 118-ஐ எட்டும் வரை ஆளுநர் காத்திருக்கும் சூழல் உருவாகியுள்ளது. இதனால் மற்ற கட்சிகளின் ஆதரவைப் பெறுவதில் தவெக-வுக்கு அழுத்தம் ஏற்பட்டுள்ளது. தவெக-வின் இந்த முதிர்ச்சியற்ற அணுகுமுறையே தற்போதைய காலதாமதத்திற்கும், அரசியல் குழப்பத்திற்கும் மிக முக்கியக் காரணம் என்பது திமுக தரப்பின் வாதமாக உள்ளது. தவெக சட்டமன்றத்தில் தனது பலத்தை நிரூபிக்குமா அல்லது ஆளுநரின் முடிவிற்காகக் காத்திருக்குமா என்பதைப் பொறுத்திருந்துதான் பார்க்க வேண்டும்.
