சென்னை அண்ணா அறிவாலயத்தில் உள்ள கலைஞர் அரங்கத்தில், திராவிட முன்னேற்றக் கழகத்தின் ஆண்டாந்திர அடையாளமான ‘முப்பெரும் விழா’ மிகுந்த பரபரப்பான சூழலில் தொடங்கியது. கட்சிக்கு உழைத்த மூத்த முன்னோடிகளுக்கு விருதுகளை வழங்கிப் கௌரவித்த திமுக தலைவர் மு.க.ஸ்டாலின், தனது உரையின் தொடக்கத்திலேயே ஆளும் தமிழக வெற்றிக் கழகத்தின் (தவெக) அரசு மீது பாய்ந்து, மாநில அரசியலில் பெரும் புயலையும் கடுமையான விவாதத்தையும் கிளப்பியுள்ளார்.
“இரண்டே இரண்டுக்குதான் போட்டி: மின்வெட்டு vs அரிவாள் வெட்டு!” ஆளும் தவெக அரசின் நிர்வாகச் சீர்கேடுகள் மற்றும் சட்டம்-ஒழுங்கு பின்னடைவை மிகக் கொச்சையான முறையில் அம்பலப்படுத்திய மு.க.ஸ்டாலின், “இன்றைக்கு தமிழகத்தில் நடக்கும் தவெக ஆட்சியில் இரண்டே இரண்டுக்கு நடுவில்தான் போட்டி நடக்கிறது. ஒன்று – தொடர்ச்சியான மின்வெட்டு, மற்றொன்று – தெருவுக்குத் தெரு நடக்கும் அரிவாள் வெட்டு!” என அதிரடியாகக் குற்றம்சாட்டினார். மக்கள் அன்றாடப் பிரச்சனைகளில் தவிக்கும் போது, அரசு முற்றிலும் முடங்கிக் கிடப்பதாக அவர் மிகக் காரசாரமாகச் சாடினார்.
“தினமும் ‘Shooting Mode’-ல் முதல்வர்: வெறும் பில்டப்பும் ரீல்ஸும் தான்!” தவெக ஆட்சியின் பிம்பத்தை உடைத்தெறியும் வகையில் பேசிய ஸ்டாலின், “சினிமாவில் நடிப்பதை நிறுத்திவிட்டேன் என்று கூறிவிட்டு வந்தவர், இப்போது மக்கள் முன்னால் முழுநேர நடிகராக நடித்துக் கொண்டிருக்கிறார். முதலமைச்சர் தினமும் ‘Shooting Mode’-ல்தான் இருக்கிறார். யார் இயக்குனர், யார் கேமராமேன் என்றே தெரியாமல் கேமரா முன்னால் போஸ் கொடுப்பதும், ரீல்ஸ் போடுவதும்தான் இந்த அரசின் சாதனையாக இருக்கிறது” என்று கடுமையாக எள்ளல் செய்தார். மேலும், திராவிட மாடல் ஆட்சியில் தொடங்கப்பட்ட மகத்தான திட்டங்களுக்குத் தவெக அரசு ஸ்டிக்கர் ஒட்டிச் சொந்தம் கொண்டாடுவதாகவும், புதிய திட்டங்கள் எதுவும் இல்லாமல் பழைய திட்டங்களை முடக்குவதே அவர்களின் வேலை என்றும் விமர்சித்தார்.
“பெரிய அலை அடித்தது போல மாயத் தோற்றம்!” ஆளுங்கட்சியின் அரசியல் வலிமையைக் கேள்விக்குள்ளாக்கிய அவர், “பெரும்பான்மைக்குத் தேவையான இடங்களைக் கூட பெற முடியாமல் ஆட்சி அமைத்துவிட்டு, ஏதோ தமிழகத்தில் மிகப்பெரிய அலை அடித்தது போலவும், தமிழ்நாடே இவர்களுக்காகக் காத்திருந்தது போலவும் செயற்கையான இமேஜ் பில்டப் செய்து கொண்டிருக்கிறார்கள். ஆனால், உண்மையில் இது கண்ணுக்குத் தெரியாமல் வந்து பரவிய ஒரு ‘மாயாவி’ போன்றது. இந்த மாயாவி நீண்ட நாட்கள் நீடிக்காது; விரைவில் மறைந்துவிடும்” என எச்சரித்தார்.
“என்னுடைய மிசா தியாகத்திற்கு மார்க் போட எவனுக்கும் தகுதியில்லை!” சமீபகாலமாகத் தனது வரலாற்றுச் சிறைவாசம் குறித்து ஆளுங்கட்சியினர் எழுப்பி வரும் அவதூறுகளுக்கு முப்பெரும் விழா மேடையில் சவுக்கடி பதிலடி கொடுத்த ஸ்டாலின், “என் வாழ்நாளில் 23 வயதில் அவசரநிலையை எதிர்த்து அனுபவித்த மிசா கொடுமைகளையும், நான் சிந்திய ரத்தத்தையும் இங்கு எவனுக்கும் நிரூபிக்க வேண்டிய அவசியம் எனக்கு இல்லை! என்னுடைய தியாகத்திற்கும் போராட்டத்திற்கும் மார்க் போட இங்கு எவனுக்கும் தகுதியில்லை!” என ஆவேசமாக முழங்கினார். சட்டமன்றத்தில் எதிர்க்கட்சிகள் கேட்கும் அடுக்கடுக்கான கேள்விகளுக்குப் பதிலளிக்க முடியாமல் திணறும் தவெக அரசு, தன் தோல்விகளைத் திசைதிருப்பவே இதுபோன்ற மலிவான அவதூறுகளைப் பரப்புகிறது என்றும் அவர் குற்றம்சாட்டினார்.
“வட்டியும் முதலுமாகத் திருப்பிச் செலுத்துவோம்!” வரவிருக்கும் இடைத்தேர்தல் குறித்துப் பேசிய திமுக தலைவர், “ஆளுங்கட்சியின் திமிர்த்தனத்திற்கும், ஆணவப் போக்கிற்கும் பாடம் புகட்டும் நல்வாய்ப்பாகவே இந்த இடைத்தேர்தல் அமைந்துள்ளது. அவர்கள் செய்த அநியாயங்களுக்கு வட்டியும் முதலுமாகத் திருப்பிச் செலுத்த நாங்கள் காத்திருக்கிறோம்; சீக்கிரமாக வருகிறோம். கடந்த சட்டசபைக் கூட்டத்தொடரில் ஆளுங்கட்சி செய்த அக்கிரமங்களைப் பார்த்த பிறகுதான் தோன்றுகிறது, நல்லவேளை கொளத்தூர் மக்கள் என்னை ஜெயிக்க வைத்து சட்டமன்றத்திற்குள் அனுப்பாதற்கு நன்றி! தப்பித்தோம்… இந்தக் கொடுமைகளையெல்லாம் எதிர்கொள்ளாமல் விட்டோமே!” எனக் குறிப்பிட்டுத் தனது தொகுதி மக்களுக்கு நன்றி தெரிவித்தார்.
இவ்விழாவில் பேசிய பொதுச்செயலாளர் துரைமுருகன், “எல்.ஐ.சி. எம்பளம் போல தமிழக மக்களைத் தொடர்ந்து பாதுகாக்கும் ஒரே இயக்கம் திமுகதான்” எனக் குறிப்பிட்டார். ஸ்டாலினின் இந்த அதிரடித் தாக்குதல், தவெக – திமுக இடையே ஏற்கனவே நிலவி வரும் அரசியல் போரை மேலும் தீவிரமடையச் செய்துள்ளது.
