நடந்து முடிந்த தேர்தலில் எதிர்பாராத பின்னடைவைச் சந்தித்த திமுக மூத்த தலைவர் அனிதா ராதாகிருஷ்ணன், “யாரென்றே தெரியாத த.வெ.க வேட்பாளருக்கு ஏன் இத்தனை வாக்குகள்?” என தொகுதி மக்களை நோக்கி வெளிப்படையாகக் கேள்வி எழுப்பியுள்ளது அரசியல் களத்தில் பெரும் விவாதத்தை ஏற்படுத்தியுள்ளது.
தேர்தல் முடிவுகள் வெளியானதைத் தொடர்ந்து, தனது தொகுதியில் கட்சி நிர்வாகிகள் மற்றும் தொண்டர்களுடன் அனிதா ராதாகிருஷ்ணன் ஆலோசனை நடத்தினார். அப்போது பேசிய அவர், தோல்வியின் தாக்கத்தை வெளிப்படுத்தும் வகையில் மிகுந்த மனவேதனையுடன் கருத்துகளைப் பகிர்ந்து கொண்டார்.
அவர் பேசுகையில், “நாங்கள் உங்களுக்கு என்ன துரோகம் செய்துவிட்டோம்? நாங்க உங்களை ஏமாற்றிட்டோமா? சொந்தக்காரர்கள் அதிகம் வசிக்கும் பூத்திலேயே நமக்கு வாக்குகள் சரிவைச் சந்தித்துள்ளது என்றால் நான் என்ன செய்வேன்? இரவு பகலாக தொகுதி மக்களுக்காக உழைத்தும், மக்கள் இப்படி ஒரு முடிவை எடுத்திருப்பது மிகுந்த வேதனையளிக்கிறது” என்று தனது அதிருப்தியைப் பதிவு செய்தார்.
குறிப்பாக, இத்தேர்தலில் புதிய சக்தியாகக் களமிறங்கிய தமிழக வெற்றி கழகத்தின் (த.வெ.க) வாக்கு வங்கியைச் சுட்டிக்காட்டிய அவர், “யாரென்றே தெரியாத த.வெ.க வேட்பாளருக்கு ஏன் இத்தனை வாக்குகளை அள்ளிக் கொடுத்தீர்கள்? எதற்காக பாரம்பரியமாகத் தொடர்ந்து ஆதரவு அளித்து வரும் தி.மு.கவுக்கு வாக்களிக்கவில்லை? இத்தனை காலம் தொகுதி மக்களுக்காக நின்ற நம்மை விட்டுவிட்டு, ஒரு புதிய நபருக்கு வாக்களித்ததன் பின்னணி என்ன?” என அடுக்கடுக்கான கேள்விகளை எழுப்பினார்.
மேலும், கட்சித் தொண்டர்கள் மற்றும் வாக்காளர்களிடம் உருக்கமாக வேண்டுகோள் விடுத்த அவர், “என்ன நடந்தாலும் சரி, இனிமேலாவது எங்களை காப்பாற்றுங்கள். நீங்கள் தொடர்ந்து ஆதரவு அளித்தால் மட்டுமே களத்தில் நின்று மக்கள் பணிகளைத் தொய்வின்றித் தொடர முடியும்” என்று தெரிவித்தார்.
ஒரு மூத்த அரசியல்வாதி தேர்தல் தோல்வியின் போது இவ்வளவு வெளிப்படையாகவும், உணர்ச்சிகரமாகவும் பேசியது திமுக தொண்டர்கள் மத்தியில் சலசலப்பை ஏற்படுத்தியுள்ளது. தேர்தல் களத்தில் புதிய கட்சிகளின் வருகை பாரம்பரிய கட்சிகளின் வாக்கு வங்கியில் எந்த அளவுக்கு தாக்கத்தை ஏற்படுத்தியுள்ளது என்பதற்கு அனிதா ராதாகிருஷ்ணனின் இந்த ஆதங்கமே சாட்சியாகப் பார்க்கப்படுகிறது. இச்சம்பவம் தற்போது சமூக வலைத்தளங்களில் அரசியல் விமர்சகர்களால் தொடர்ந்து விவாதிக்கப்பட்டு வருகிறது.
