கரூர் கூட்ட நெரிசல் சம்பவத்தில் உயிரிழந்தவர்களின் குடும்பத்தினருக்குத் தமிழக அரசு வழங்கிய அரசுப் பணி நியமனங்கள் செல்லாது என்று உயர் நீதிமன்றம் அண்மையில் தீர்ப்பளித்துள்ளது. இந்தத் தீர்ப்பு தொடர்பாகத் தமிழக பாஜக மாநிலத் தலைவர் நயினார் நாகேந்திரன் செய்தியாளர்களைச் சந்தித்துப் பேசுகையில், முதலமைச்சர் விஜய்யின் அவசர முடிவுகளையே கடுமையாக விமர்சித்துள்ளார்.
செய்தியாளர்களிடம் பேசிய நயினார் நாகேந்திரன், ஏற்கனவே மிகப்பெரிய சோகத்திலும் துயரத்திலும் இருக்கும் குடும்பங்களுக்கு இந்த நீதிமன்றத் தீர்ப்பு மேலும் அதிர்ச்சியையும் வேதனையையும் அளித்துள்ளதாகத் தெரிவித்தார். “தமிழக முதலமைச்சர் விஜய் எந்தவொரு விஷயத்தையும் தீர ஆராயாமல் அவசரப்பட்டு முடிவுகளை எடுக்கிறார். இதன் விளைவாகவே இன்றைக்கு அந்தப் பாதிக்கப்பட்ட மக்கள் மீண்டும் பெரும் துயரத்தில் ஆழ்ந்துள்ளார்கள்” என்று சாடினார்.
தொடர்ந்து பேசிய அவர், “ஒரு பழமொழி சொல்வார்கள்… ‘கண்ணை இழந்தவன், மீண்டும் கண்ணைப் பெற்று, அதைத் திரும்பவும் இழந்தது போல்’ தான் இன்றைய நிலைமை அமைந்திருக்கிறது. ஏற்கனவே நொந்துபோய், துயரத்தில் இருந்த அந்த மக்களுக்கு அரசுப் பணி என்று நம்பிக்கையைக் கொடுத்து, இப்போது அது செல்லாது என்ற நிலை வந்திருப்பது கஷ்டத்துக்கு மேல் கஷ்டத்தைக் கொடுத்துள்ளது” என்று குறிப்பிட்டார்.
அரசுப் பணி போன்ற சட்டப்பூர்வ அறிவிப்புகளை வெளியிடுவதற்கு முன்பாக, அதன் சட்டப் பின்னணிகள் மற்றும் நடைமுறைகளைத் துறை சார்ந்த வல்லுநர்களுடன் முதலமைச்சர் கலந்து ஆலோசித்திருக்க வேண்டும் என்று நயினார் நாகேந்திரன் வலியுறுத்தினார்.எந்தவொரு ஆலோசனையும் இன்றி எடுக்கப்பட்ட இந்தத் தவறான நிர்வாக முடிவால் அரசுக்குத் பின்னடைவு ஏற்பட்டுள்ளதோடு, பாதிக்கப்பட்ட குடும்பங்களின் வாழ்வாதார நம்பிக்கையும் கேள்விக்குறியாகியுள்ளது என்று பாஜக தரப்பில் குற்றம்சாட்டப்பட்டுள்ளது.
