தஞ்சாவூரில் நடைபெற்ற காவிரி உரிமைப் போராட்ட ஆர்ப்பாட்டத்தில் பேசிய பேச்சு தொடர்பாக, சட்டமன்ற எதிர்க்கட்சித் தலைவர் உதயநிதி ஸ்டாலின் சென்னை நீலாங்கரையில் உள்ள அவரது இல்லத்தில் வைத்து தஞ்சாவூர் காவல்துறையினரால் இன்று காலை அதிரடியாகக் கைது செய்யப்பட்டார்.கைது குறித்து செய்தியாளர்களிடம் பேசிய உதயநிதி ஸ்டாலின், “அரசு தன் மீதான பயத்தின் காரணமாகவே இந்த ஜோடிக்கப்பட்ட வழக்குகளைப் பதிவு செய்துள்ளது. இந்த கைதை ஒரு காமெடியாகவே பார்க்கிறேன், இதனைச் சட்டப்படி எதிர்கொள்வேன்” எனத் தெரிவித்துள்ளார்.
தஞ்சாவூர் கிழக்குக் காவல் நிலையத்தில் பதிவு செய்யப்பட்ட எஃப்.ஐ.ஆர்-ன் படி, புதிய குற்றவியல் சட்டமான பாரதிய நியாய சன்ஹிதாவின் (BNS) 7 பிரிவுகள் மற்றும் 2 சிறப்புச் சட்டப் பிரிவுகள் உட்பட மொத்தம் 9 பிரிவுகளின் கீழ் வழக்குப்பதிவு செய்யப்பட்டுள்ளது:
BNS பிரிவு 196:பல்வேறு தரப்பினரிடையே பகைமையை வளர்த்தல் மற்றும் பொது அமைதிக்குக் குந்தகம் விளைவித்தல்.
BNS பிரிவு 192:கலவரத்தைத் தூண்டும் நோக்கில் ஆத்திரமூட்டுதல்.
BNS பிரிவு 296(b):பொது இடத்தில் அருவருக்கத்தக்க அல்லது ஆபாசச் சொற்களைப் பேசுதல்.
BNS பிரிவு 351(2):குற்ற நோக்கத்துடன் மிரட்டல் விடுத்தல்.
BNS பிரிவு 352:திட்டமிட்டு அவமதித்து பொது அமைதியைக் குலைக்கத் தூண்டுதல்.
BNS பிரிவு 79:பெண்ணின் கண்ணியத்திற்கும் மானத்திற்கும் பங்கம் விளைவிக்கும் வகையில் பேசுதல்.
BNS பிரிவு 61:குற்றவியல் சதித் திட்டத்தில் ஈடுபடுதல்.
தமிழ்நாடு பெண்கள் வன்கொடுமை தடுப்புச் சட்டம் (பிரிவு 4):பெண்களுக்கு எதிரான அவமரியாதை மற்றும் தொல்லைகள்.
தகவல் தொழில்நுட்பச் சட்டம் (பிரிவு 67):மின்னணு ஊடகங்கள் வாயிலாக சர்ச்சைக்குரிய தகவல்களைப் பரப்புதல்.
நாளைய தினம் சட்டப்பேரவைக் கூட்டத்தொடர் தொடங்கவுள்ள நிலையில், அரசின் தோல்விகளை எதிர்க்கட்சித் தலைவர் அம்பலப்படுத்தி விடுவார் என்ற அச்சத்தின் காரணமாகவே இந்த கைது நடவடிக்கை எடுக்கப்பட்டுள்ளதாக திமுக தரப்பு குற்றம் சாட்டியுள்ளது.இந்த கைது நடவடிக்கைக்கு எதிர்ப்பு தெரிவித்து மாநிலத்தின் பல்வேறு பகுதிகளில் திமுக தொண்டர்கள் கொதித்தெழுந்துள்ளதால் பரபரப்பு நிலவி வருகிறது.
