சர்வதேச அளவில் பெரும் பரபரப்பை ஏற்படுத்திய ஜான்சன் & ஜான்சன் (Johnson & Johnson) நிறுவனத்தின் டால்கம் பவுடர் தொடர்பான சட்டப் போராட்டம் முடிவுக்கு வந்துள்ளது. தங்கள் தயாரிப்புகளான பேபி பவுடர் மற்றும் டால்கம் பவுடர் பயன்பாட்டினால் கருப்பை புற்றுநோய் (Ovarian Cancer) ஏற்படுவதாகத் தொடரப்பட்ட பல்லாயிரக்கணக்கான வழக்குகளைத் தீர்ப்பதற்காக, சுமார் ₹52,668 கோடி ($5.5 பில்லியன்) இழப்பீடு வழங்க அந்நிறுவனம் ஒப்புக்கொண்டுள்ளது.
கடந்த பத்து ஆண்டுகளாகத் தொடர்ந்து நடைபெற்று வந்த இந்தச் சட்டப் போரில், சுமார் 76,000 வழக்குகள் தற்போது ஒருங்கிணைக்கப்பட்டுள்ளன. இந்தத் தீர்வு ஒப்பந்தம் இறுதி செய்யப்பட வேண்டுமெனில், பாதிக்கப்பட்டவர்களில் குறைந்தபட்சம் 95 சதவீதம் பேர் இதற்கு ஒப்புதல் அளிக்க வேண்டும். இந்த இழப்பீட்டுத் தொகையை ஜான்சன் & ஜான்சன் நிறுவனம் 2027 மற்றும் 2028-ம் ஆண்டுகளில் வழங்கத் திட்டமிட்டுள்ளது. சட்ட நிபுணர்களின் கணிப்புப்படி, பாதிக்கப்பட்டவர்களின் பங்களிப்பைப் பொறுத்து இந்தத் தொகை ₹67,000 கோடிக்குமேல் ($7 பில்லியன்) அதிகரிக்க வாய்ப்புள்ளது.
ஜான்சன் & ஜான்சன் நிறுவனத்தின் வழக்கறிஞர் எரிக் ஹாஸ் கூறுகையில், இந்த வழக்குகள் ஆதாரமற்றவை என்று மீண்டும் வலியுறுத்தியுள்ளார். இருப்பினும், நீண்டகாலச் சட்டச் சிக்கல்களுக்கு முற்றுப்புள்ளி வைத்து, நிறுவனத்தின் முக்கியப் பணியான மருத்துவத் தயாரிப்புகளில் கவனம் செலுத்தவே இந்தத் தீர்வை ஏற்றுக்கொண்டதாக அவர் தெரிவித்தார். இதற்கு முன், திவாலானதாக அறிவித்து வழக்குகளை முடிக்க நிறுவனம் மேற்கொண்ட ‘டெக்சாஸ் டூ-ஸ்டெப்’ (Texas two-step) முயற்சி நீதிமன்றங்களால் நிராகரிக்கப்பட்டது குறிப்பிடத்தக்கது.
இந்த உடன்படிக்கையானது தற்போது நிலுவையில் உள்ள வழக்குகளுக்கு மட்டுமே பொருந்தும்; எதிர்காலத்தில் வரக்கூடிய வழக்குகளுக்கு இது பொருந்தாது. முன்னதாக, தனது டால்கம் பவுடர்களில் கல்நார் (Asbestos) கலந்திருப்பதாகத் தொடரப்பட்ட பெரும்பாலான வழக்குகளை ஜான்சன் & ஜான்சன் ஏற்கெனவே தீர்த்து வைத்துள்ளது. 2020-ம் ஆண்டிலேயே அமெரிக்காவில் டால்கம் பவுடர் தயாரிப்புகளை விற்பனை செய்வதை அந்நிறுவனம் நிறுத்திவிட்டு, மக்காச்சோள மாவு (Cornstarch) சார்ந்த தயாரிப்புகளுக்கு மாறியது. தற்போது மேற்கொள்ளப்பட்டுள்ள இந்த நடவடிக்கை, உலகளாவிய நுகர்வோர் பாதுகாப்பு மற்றும் கார்ப்பரேட் பொறுப்புணர்வு விவாதங்களில் ஒரு முக்கிய மைல்கல்லாகப் பார்க்கப்படுகிறது.
