இந்திய ரிசர்வ் வங்கி (RBI) தனது 2026-ஆம் நிதியாண்டின் முதல் இருமாத நிதிக் கொள்கை ஆய்வறிக்கையை வெளியிட்டுள்ளது. இதில், வங்கிகளுக்கான ரெப்போ வட்டி விகிதத்தை 5.25 சதவீதமாகவே எவ்வித மாற்றமும் இன்றி நீட்டிக்க ரிசர்வ் வங்கியின் நிதிக் கொள்கைக் குழு (MPC) ஒருமனதாக முடிவு செய்துள்ளது. இதன் காரணமாக, வீடு, வாகனம் மற்றும் தனிநபர் கடன்களுக்கான வட்டி விகிதங்களில் தற்போதைக்கு எந்தக் குறைவும் இருக்காது என்பது உறுதியாகியுள்ளது.
கடந்த 2025-ஆம் ஆண்டில் வட்டி விகிதங்கள் சுமார் 125 புள்ளிகள் (1.25%) வரை குறைக்கப்பட்ட நிலையில், இந்த முறையும் வட்டி குறையும் எனப் பெரும் எதிர்பார்ப்பு நிலவியது. ஆனால், சமீபகாலமாக உலக அளவில் நிலவும் புவிசார் அரசியல் பதற்றங்கள் (குறிப்பாக ஈரான்-இஸ்ரேல் போர்) மற்றும் அதன் விளைவாகக் கச்சா எண்ணெய் விலையில் ஏற்பட்டுள்ள ஏற்ற இறக்கங்கள் பணவீக்கத்தை அதிகரிக்கும் அபாயத்தை ஏற்படுத்தியுள்ளன. இதனால், முன்னெச்சரிக்கை நடவடிக்கையாக வட்டி விகிதத்தில் ரிசர்வ் வங்கி மாற்றங்களைச் செய்யவில்லை.
பணவீக்கத்தைக் கட்டுப்படுத்துவதே எங்களின் முக்கிய நோக்கம்… என்று தெரிவித்த ரிசர்வ் வங்கி ஆளுநர் சஞ்சய் மல்ஹோத்ரா, நுகர்வோர் விலை குறியீடு (CPI) அடிப்படையிலான பணவீக்கம் 4.6 சதவீதத்தை எட்டும் என எதிர்பார்க்கப்படுவதால் இந்த முடிவு எடுக்கப்பட்டுள்ளதாகக் குறிப்பிட்டார். பொருளாதார வளர்ச்சியை உறுதிப்படுத்தும் அதே வேளையில், விலையேற்றத்தைத் தடுப்பதற்கான சமநிலையை எட்ட வேண்டிய கட்டாயத்தில் ரிசர்வ் வங்கி இருப்பதாக அவர் விளக்கினார்.
இதன் மூலம் நடுத்தர மக்களுக்கு ஏற்படும் தாக்கம்… என்னவென்றால், ஏற்கனவே லோன் வாங்கி இஎம்ஐ கட்டி வருபவர்களுக்கு வட்டி குறையாது. அதேசமயம் வட்டி அதிகரிக்கப்படவும் இல்லை என்பது ஒரு ஆறுதலான விஷயமாகப் பார்க்கப்படுகிறது. வங்கிகள் தங்களின் கடன் வட்டி விகிதங்களை ரிசர்வ் வங்கியின் ரெப்போ ரேட்டுடன் இணைத்துள்ளதால், சந்தையில் புதிய கடன்களுக்கான வட்டி விகிதங்களும் தற்போதைய நிலையிலேயே தொடரும்.
அடுத்த சில மாதங்களில் பணவீக்கம் கட்டுக்குள் வரும் பட்சத்தில், வரும் ஆகஸ்ட் அல்லது அக்டோபர் மாதக் கூட்டங்களில் வட்டி குறைப்பு குறித்த சாதகமான அறிவிப்புகள் வெளியாக வாய்ப்புள்ளதாகப் பொருளாதார நிபுணர்கள் கணித்துள்ளனர். அதுவரை பொதுமக்கள் தங்கள் நிதித் திட்டமிடலைத் தற்போதைய வட்டி விகிதத்திற்கு ஏற்பவே அமைத்துக் கொள்ள வேண்டியது அவசியமாகும். 2026-27 நிதியாண்டில் நாட்டின் மொத்த உள்நாட்டு உற்பத்தி (GDP) வளர்ச்சி 6.9 சதவீதமாக இருக்கும் என்றும் ரிசர்வ் வங்கி கணித்துள்ளது.
