வரவிருக்கும் தொடர் பண்டிகைக் காலங்களை முன்னிட்டுத் தமிழ்நாட்டில் சர்க்கரையின் தேவை கணிசமாக அதிகரித்துள்ள நிலையில், அதன் சில்லறை விற்பனை விலை வரலாறு காணாத அளவில் உயர்ந்து கிலோ ஒன்றுக்கு ரூ.72 வரை விற்பனை செய்யப்பட்டு வருகிறது. கடந்த சில வாரங்களுக்கு முன்பு வரை கிலோ ரூ.45 முதல் ரூ.50 வரை விற்பனையான சர்க்கரை, தற்போது இந்த திடீர் விலை உயர்வைச் சந்தித்துள்ளது பொதுமக்கள் மற்றும் பலகார உற்பத்தியாளர்களைப் பெரும் அதிர்ச்சியில் ஆழ்த்தியுள்ளது.
தமிழ்நாட்டிற்குத் தேவையான பெரும்பாலான சர்க்கரை வரத்து மகாராஷ்டிரா மற்றும் உத்தரப் பிரதேச மாநிலங்களில் இருந்தே வருகிறது. எனினும், அங்குப் போதிய மழை இல்லாததால் கரும்பு உற்பத்தி சரிவடைந்துள்ளதும், சர்க்கரை ஆலை உரிமையாளர்கள் செயற்கையான தட்டுப்பாட்டை உருவாக்கிப் பதுக்கலில் ஈடுபடுவதும் இந்த கடுமையான விலை உயர்வுக்கு முதன்மை காரணம் எனச் சில்லறை மற்றும் மொத்த வியாபாரிகள் குற்றம் சாட்டுகின்றனர்.
அத்துடன், மத்திய அரசின் ‘ஈ-20’ (E-20) பெட்ரோல் திட்டத்திற்காகக் கரும்புச் சாற்றில் இருந்து அதிகளவில் எத்தனால் தயாரிக்கப்பட்டுத் திருப்பப்படுவதும் சந்தையில் சர்க்கரைக் தட்டுப்பாட்டை தீவிரப்படுத்தியுள்ளதாக வியாபாரிகள் தரப்பில் சுட்டிக்காட்டப்படுகிறது.
அடுத்து வரவிருக்கும் விநாயகர் சதுர்த்தி, ஆயுத பூஜை மற்றும் தீபாவளி பண்டிகைக் காலங்களில் இனிப்புப் பலகாரங்களின் தயாரிப்பு அதிகரிக்கும் என்பதால் சர்க்கரையின் தேவை இன்னும் அதிகரிக்கும். எனவே, மத்திய மற்றும் மாநில அரசுகள் உடனடியாக தலையிட்டுச் சர்க்கரை பதுக்கலைக் கட்டுப்படுத்த நடவடிக்கை எடுக்க வேண்டும் என்றும், சந்தையில் அத்தியாவசியப் பொருட்களின் விலையைச் சீராக்க வேண்டும் என்றும் நுகர்வோர்களும் வணிகர்களும் கோரிக்கை விடுத்துள்ளனர்.
