மகாராஷ்டிர மாநிலம் மும்பையில் நாட்டையே அதிர்ச்சிக்குள்ளாக்கும் வகையிலான குற்றச்சம்பவம் ஒன்று வெளிச்சத்திற்கு வந்துள்ளது. நகரின் முக்கியப் பகுதியில் தனியாகச் சென்றுகொண்டிருந்த விமானப் பணிப்பெண் ஒருவரிடம், திருநங்கை போல் வேடமிட்டு வந்த நபர் பாலியல் அத்துமீறலில் ஈடுபட்ட சம்பவம் பெரும் பரபரப்பை ஏற்படுத்தியுள்ளது.
பாதிக்கப்பட்ட பெண் அளித்த தகவலின்படி, அவர் பணி முடிந்து தனது குடியிருப்புக்குத் திரும்பிக்கொண்டிருந்தபோது, திருநங்கை உடையில் வந்த நபர் ஒருவர் அவரிடம் உதவி கேட்பது போலப் பேசி நெருங்கியுள்ளார். சந்தேகமடையாத அந்தப் பெண் பதிலளித்த நேரத்தில், அந்த நபர் திடீரென அவரிடம் தவறாக நடந்து கொண்டு பாலியல் தொல்லை கொடுத்துள்ளார். இதனால் அதிர்ச்சியடைந்த அந்தப் பெண் சத்தமிடவே, அப்பகுதியில் இருந்தவர்கள் ஓடிவருவதைக் கண்டு அந்த நபர் அங்கிருந்து தப்பி ஓடினார்.
இச்சம்பவம் குறித்து பாதிக்கப்பட்ட விமானப் பணிப்பெண் உடனடியாக உள்ளூர் காவல் நிலையத்தில் புகார் அளித்தார். புகாரின் பேரில் வழக்குப் பதிவு செய்த மும்பை காவல்துறையினர், சம்பவம் நடைபெற்ற இடத்தின் அருகில் இருந்த கண்காணிப்பு கேமரா (CCTV) பதிவுகளைத் தீவிரமாக ஆய்வு செய்தனர்.
போலீஸாரின் தீவிர தேடுதல் வேட்டையின் முடிவில், திருநங்கை வேடமிட்டுப் பெண்ணிடம் அத்துமீறிய நபரை அடையாள கண்டு அதிரடியாகக் கைது செய்தனர். விசாரணையில், அவர் காவல்துறையினரின் பிடியிலிருந்து தப்பிப்பதற்காகவும், சந்தேகத்தைத் தவிர்க்கவும் இதுபோன்று திருநங்கை வேடமிட்டுப் பெண்களிடம் குற்றங்களில் ஈடுபட்டு வந்தது தெரியவந்தது. கைதான நபர் மீது பல்வேறு சட்டப் பிரிவுகளின் கீழ் வழக்குப்பதிவு செய்துள்ள காவல்துறையினர், நீதிமன்றத்தில் ஆஜர்படுத்தி சிறையில் அடைத்தனர். இச்சம்பவம் அப்பகுதியில் உள்ள பணிபுரியும் பெண்களின் இடையே அச்சத்தையும் அதிர்ச்சியையும் ஏற்படுத்தியுள்ளது.
