தஞ்சாவூரில் நடைபெற்ற காவிரி நீர் உரிமைப் போராட்டத்தின் போது பேசிய பேச்சு தொடர்பாக எழுந்த புகாரின் பேரில், தமிழக சட்டப்பேரவை எதிர்க்கட்சித் தலைவரும் திமுக இளைஞரணி செயலாளருமான உதயநிதி ஸ்டாலின் காவல்துறையினரால் விசாரணைக்கு உட்படுத்தப்பட்டு பின்னர் விடுவிக்கப்பட்டார். இந்த வழக்கில் முன்னதாக சென்னை உயர் நீதிமன்றம் பிறப்பித்த உத்தரவின்படி, விசாரணை முடிந்ததும் அவரை நிலைய பிணையில் (Station Bail) விடுவிக்க நடவடிக்கை எடுக்கப்பட்டது.
முன்னதாக, தவெக மகளிர் அணி நிர்வாகிகள் அளித்த புகாரின் அடிப்படையில் தஞ்சாவூர் காவல்துறையினர் சென்னை நீலாங்கரையில் உள்ள அவரது இல்லத்தில் வைத்து உதயநிதியைக் கைது செய்து விசாரணைக்காக அழைத்துச் சென்றனர். இச்சம்பவம் தமிழக அரசியல் களத்தில் பெரும் கொந்தளிப்பை ஏற்படுத்திய நிலையில், திமுக வழக்கறிஞர்கள் தரப்பில் சென்னை உயர் நீதிமன்றத்தில் அவசர மனுத் தாக்கல் செய்யப்பட்டது. மனுவை விசாரித்த நீதிமன்றத்தில், அரசுத் தரப்பு வழக்கறிஞர் ஆஜராகி உதயநிதியை நீதிமன்றக் காவலில் வைக்க காவல் துறை விரும்பவில்லை என்றும், விசாரணை மட்டுமே நடத்தப்பட்டு பிணையில் விடுவிக்கப்படுவார் என்றும் உறுதி அளித்தார்.
இதனைப் பதிவு செய்த உயர் நீதிமன்றம், விசாரணைக்குப் பிறகு அன்றைய தினமே அவரை விடுவிக்க வேண்டும் என்றும், காவல் துறை விசாரணைக்கு உதயநிதி முழு ஒத்துழைப்பு அளிக்க வேண்டும் என்றும் உத்தரவிட்டது. நீதிமன்றத்தின் வழிகாட்டுதலின்படி சுமார் ஒரு மணி நேரத்திற்கும் மேலாக நடைபெற்ற தீவிர விசாரணைக்குப் பிறகு உதயநிதி ஸ்டாலின் காவல் நிலையத்திலிருந்து விடுவிக்கப்பட்டார்.
உதயநிதி விடுவிக்கப்பட்ட செய்தி பரவியதும், காவல் நிலையத்திற்கு வெளியே காத்திருந்த ஆயிரக்கணக்கான திமுக தொண்டர்கள் மற்றும் நிர்வாகிகள் உற்சாகக் கோஷங்களை எழுப்பி அவருக்கு வரவேற்பு அளித்தனர். தவெக அரசின் இந்த கைது நடவடிக்கை அரசியல் பழிவாங்கும் செயல் என திமுக சாடி வரும் நிலையில், சட்டப்பேரவைக் கூட்டத்தொடர் தொடங்கவுள்ள சூழலில் இச்சம்பவம் மாநில அரசியலில் மேலும் பரபரப்பை அதிகரித்துள்ளது.
