வங்கி, காப்பீடு மற்றும் மியூச்சுவல் ஃபண்ட் ஆகிய நாட்டின் முன்னணி நிதித் துறைகள் அனைத்திலும் ஒரே ‘கஸ்டமர் ஐடி’ (Single Customer ID) முறையைப் பயன்படுத்த நிதி நிறுவனங்கள் தீவிரமாக ஆயத்தமாகி வருகின்றன.
தற்போதுள்ள நடைமுறையின்படி, பொதுமக்கள் ஒவ்வொரு முறையும் ஒரு புதிய வங்கியில் கணக்கு தொடங்கும்போதோ, காப்பீட்டு நிறுவனங்களில் ஆயுள் அல்லது மருத்துவ இன்சூரன்ஸ் பாலிசிகளை வாங்கும்போதோ, பங்குச்சந்தை மற்றும் மியூச்சுவல் ஃபண்டுகளில் புதிய முதலீடுகளைச் செய்யும்போதோ தனித்தனியாகக் கேஒய்சி (KYC) ஆவணங்களைச் சமர்ப்பிக்க வேண்டிய கட்டாயம் நிலவி வருகிறது. இதனால் வாடிக்கையாளர்களுக்கு ஏற்படும் தேவையற்ற அலைச்சல், காலவிரயம் மற்றும் ஆவணப் சரிபார்ப்புத் தாமதங்களை முற்றிலுமாகத் தவிர்க்கும் நோக்கில், நாட்டின் மிக முக்கிய நிதி ஒழுங்குமுறை அமைப்புகள் களமிறங்கியுள்ளன.
அதன்படி, இந்திய ரிசர்வ் வங்கி (RBI), பங்குச்சந்தை ஒழுங்குமுறை வாரியமான செபி (SEBI) மற்றும் காப்பீட்டு ஒழுங்குமுறை அமைப்பான ஐஆர்டிஏஐ (IRDAI) ஆகிய மூன்றும் இணைந்து ‘கேஒய்சி 2.0’ (KYC 2.0) என்ற புதிய சீர்திருத்த வழிகாட்டு நெறிமுறைகளை வடிவமைத்து அமல்படுத்த உள்ளன.
இப்புதிய ஒருங்கிணைந்த அமைப்பின் கீழ், வாடிக்கையாளர் ஏதேனும் ஒரு நிதி அமைப்பில் தனது தகவல்களைச் சரிபார்த்துப் பதிவேற்றம் செய்துவிட்டால் போதும். பிற நிதிச் சேவைகளைப் பெறும்போது வாடிக்கையாளர் ஒருமுறை மட்டும் டிஜிட்டல் ஒப்புதல் (Consent) அளித்தாலே போதுமானது. மத்திய பதிவேட்டில் (Central Registry) பாதுகாப்பாகச் சேமிக்கப்பட்டுள்ள அவர்களின் அடையாளத் தரவுகளை வங்கிகளோ அல்லது காப்பீட்டு நிறுவனங்களோ நேரடியாகப் பெற்றுக்கொள்ள முடியும். இதன் மூலம் ஒட்டுமொத்த நிதிப் பரிவர்த்தனைகளுக்கும் ஒரே ஒரு கஸ்டமர் ஐடி மட்டுமே போதுமானதாக மாறும்.
அமலாக்கக் காலக்கெடுவைப் பொறுத்தவரை, தேசிய வங்கிகள் மற்றும் காப்பீட்டு நிறுவனங்கள் வரும் ஆகஸ்ட் மாதம் முதலே இப்புதிய கேஒய்சி 2.0 முறையை முதற்கட்டமாக நடைமுறைக்குக் கொண்டுவரத் திட்டமிட்டுள்ளன. பரஸ்பர நிதி (Mutual Fund) நிறுவனங்கள் இந்தச் அமைப்பில் இணைவதற்குச் சற்று கூடுதல் கால அவகாசம் எடுத்துக்கொண்டாலும், பங்குச்சந்தை புரோக்கரேஜ் நிறுவனங்கள் மற்றும் ஃபண்ட் அமைப்புகள் அனைத்தும் இந்த ஆண்டின் இறுதிக்குள் இப்புதிய டிஜிட்டல் நடைமுறைக்குள் முழுமையாகக் கொண்டுவரப்படும் என்று தகவல்கள் தெரிவிக்கின்றன.
