தமிழக சட்டமன்றத்தில் தவெக அரசின் அதிரடி ஊழல் ஒழிப்பு நடவடிக்கைகள் குறித்து முதலமைச்சர் சா. ஜோசப் விஜய் பேசிக்கொண்டிருந்த போது, அதற்குப் பதில் கூற முடியாமல் திமுக உறுப்பினர்கள் ஒட்டுமொத்தமாக அவையை விட்டு வெளிநடப்பு செய்தனர். திமுகவினர் வெளியேறியதைத் தொடர்ந்து அவையில் இருந்த மற்ற உறுப்பினர்களின் முன்னிலையில் பேசிய முதலமைச்சர் விஜய், எதிர்க்கட்சிகளின் நையாண்டி அரசியலுக்குத் தனக்கே உரிய சினிமா பாணியில் ஒரு குட்டிக்கதையைக் கூறி அதிரடிப் பதிலடி கொடுத்துள்ளார்.
அவையில் முதல்வர் விஜய் பேசியதாவது, “எனக்கு இந்தச் சமயத்தில் ஒரு குட்டி கதை ஒன்று ஞாபகம் வருகிறது, அதை இங்குச் சொல்வதில் தவறில்லை என்று நினைக்கிறேன். ஒரு ஊரில் ஒரு பெரியவர் வெயில் ரொம்ப ஜாஸ்தியாக இருக்கிறது என்று சொல்லிக்கொண்டு, தனது கண்ணுக்கு மேலே கையை வைத்துக்கொண்டு இப்படிச் சுற்றிலும் யாரையோ தீவிரமாகத் தேடிக்கொண்டிருந்தாராம். அப்போது அவர் கூட இருந்த ஒரு சின்ன பையன், ‘பெரியவரே அங்கே அப்படி என்ன தேடுகிறீர்கள்?’ என்று கேட்டுள்ளான். அதற்கு அந்தப் பெரியவர் சொன்னாராம், ‘அது ஒன்றுமில்லை தம்பி, உன்னுடைய அப்பா எப்பொழுதும் இங்கதான் இருப்பாருன்னு என்று ஊருக்குள் சொன்னார்கள், அதான், உங்க அப்பாவை காணும் தேடிக்கொண்டிருக்கிறேன். ஆனால் இப்போது எங்குத் தேடியும் உங்க அப்பாவைக் காணவில்லையே’ என்று கேட்டாராம்.”
தொடர்ந்து பேசிய முதலமைச்சர், “இந்தக் கதையை நான் சும்மா ஒரு உதாரணத்திற்குத்தான் சொல்கிறேன், யாரும் இதைத் தப்பாக எடுத்துக்கொண்டு இங்கே டென்ஷன் ஆக வேண்டாம். உங்களைப் போல அரசியல் மேடைகளில் எங்களுக்கும் இப்படி நக்கலாக, நையாண்டியாகச் சம்பந்தம் இல்லாத குட்டிக்கதைகள் எல்லாம் பேசி அரசியலைத் திசைதிருப்பத் தெரியும் என்பதை அவர்களுக்குப் புரிய வைக்கவே இதைச் சொன்னேன்” என்று குறிப்பிட்டார்.
மேலும், தவெக அரசின் மீதான ஊழல் புகார்களைப் பட்டியலிடத் தொடங்கிய உடனே திமுகவினர் அவையை விட்டு ஓடியதைச் சுட்டிக்காட்டிய முதல்வர், “நான் இங்குப் பேசத் தொடங்கி வெறும் ஐந்து நிமிடம் கூட ஆகவில்லை. அதற்குள் அதற்குப் பதில் சொல்ல முடியாமல் பயந்து கொண்டு ஓடிவிட்டார்கள். வெறும் அஞ்சு நிமிஷம் நான் உண்மைகளைப் பேசினதுக்கே இவர்களின் கொளத்தூர் தொகுதியே ஒட்டுமொத்தமாகக் காலி ஆகிவிட்டது” என்று மிகக் காரசாரமாக நக்கல் தொனியில் திமுகவின் வெளிநடப்பைக் கிண்டல் செய்து தனது சட்டமன்ற உரையை முதலமைச்சர் விஜய் நிறைவு செய்தார்.
